Ջիվան Ավետիսյանի «Դրախտի դարպասը» լիամետրաժ խաղարկային ֆիլմը Օնտարիոյի (Կանադա) միջազգային կինոփառատոնի 4 անվանակարգերում ճանաչվել է լավագույնը։ Այդ մասին հայտնում է ՀՀ ԿԳՄՍ նախարարությունը։
Համաձայն աղբյուրի այդ անվանակարգերն են`«Լավագույն ձայն», «Լավագույն երաժշտություն», «Լավագույնսցենար», «Լավագույն միջազգային ֆիլմ»:
Ֆիլմը պատմում է գերմանացի 50-ամյա լրագրող Ռոբերտ Ստերնվալի մասին, ով 2016 թ.-ին վերադառնում է Արցախ՝ լուսաբանելու քսաներկու տարվա ընդմիջումից հետո վերսկսված պատերազմը։ Լրագրողական հետաքննության արդյունքում ծանոթանում է օպերայի երիտասարդ երգչուհի Սոֆյա Մարտիի հետ։
Ռոբերտի և Սոֆյայի հաճախակի հանդիպումները վերածվում են սիրո պատմության, սակայն պարզվում է, որ Սոֆյան անհայտ կորած ֆոտոլրագրող Էդգար Մարտիրոսյանի աղջիկն է, ում 1992 թ.-ին՝ Թալիշի անկման օրը, Ռոբերտը թողել էր գյուղում՝ գերեվարված, ապա յուրացրել նրա՝ մարտի դաշտում արված լուսանկարները…
Ֆիլմը ստեղծվել է «Ֆիշ Այ Արթ» մշակութային հիմնադրամի և «Արթբոքս» կինոընկերության կողմից «Հայաստանի ազգային կինոկենտրոն» ՊՈԱԿ-ի ֆինանսական աջակցությամբ:
Թողնել պատասխան