Երևանի պետական համալսարանում հատուկ Արցախի երիտասարդների համար կազմակերպել է միջոցառում «Կյա՞մ ես PR» խորագրով։ Միջոցառման նախաձեռնողները Սոցիոլոգիայի ֆակուլտետի «Հասարակայնության հետ կապեր» (PR) մագիստրոսական ծրագրի ղեկավար Նվարդ Մելքոնյանն ու մագիստրատուրայի 1-ին կուրսի ուսանողներն էին։
«Հասարակայնության հետ կապեր և հաղորդակցությունների կառավարում» թեմայով դասընթացին մասնակցել են Արցախի տարբեր շրջաններից ՀՀ-ում ապաստանած շուրջ 30 երիտարսարդներ։ Դասընթացը վարել է ս.գ.թ., ԵՊՀ Սոցիալական աշխատանքի և սոցիալական տեխնոլոգիաների ամբիոնի դոցենտ, SPRING PR ընկերության համահիմնադիր՝ Նվարդ Մելքոնյանը։
Շուրջ երեք ժամ տևած ինտերակտիվ բանախոսության ընթացքում, ընկերական ջերմ մթնոլորտում քննարկվեցին PR արշավների կազմակերպման սկզբունքները, ԶԼՄ-ի հետ հարաբերությունների կարևորությունը, թիրախային լսարանի հետ աշխատանքի նրբությունները, դիտարկվեցին PR-արշավների կազմակերպման հայաստանյան և միջազգային պրակտիկայից հետաքրքիր օրինակները։ Հանդիպումն անցավ ստեղծարար գաղափարների փոխանակման, դրական հույզերի և ոգևորության մթնոլորտում։
Դասընթացի ավարտին երիտասարդներին հանձնվեցին մասնակցության վկայականներ։
Կազմակերպիչները շեշտեցին, որ միջոցառման նպատակն էր Արցախի երիտասարդներին ծանոթացնել 21-րդ դարի ամենապահանջված մասնագիտություններից մեկին, ինչպես նաև ձևավորել նոր ծանոթություններ, գործընկերային կապեր և ընձեռնել հնարավորություններ նոր նախաձեռնությունների և նախագծերի իրականացման համար։
Թողնել պատասխան