Սիրիայում և Թուրքիայում փետրվսրի 6-ին տեղի ունեցած երկրաշարժերի հետևանքով 13 հայ է մահացել։ Այդ մասին այսօր հրավիրված ասուլիսում հայտնել է Սփյուռքի գործերի հանձնակատարի գրասենյակի ռազմավարությունների մշակման բաժնի պետ Հովհաննես Ալեքսանյանը։
Նրա տվյալներով` Սիրիայում 2 մարդ է մահացել` մայր ու որդի Միրնա Մինասյան–Թենեքեջյանը և Ալբերտ Թենեքեջյանը։ Թուրքիայի Մալաթիա քաղաքում 4 զոհ կա` Սանիթ Թաբաշը, Աիդա Թաբաշը և Ալեքս Թաբաշը, ինչպես նաև Մարիամ Քարատաշը։ Ալեքսանդրետում էլ մահացել է Պայծառ Սիլահլին ու ևս մեկ ընտանիք` Դշխուն Մեսրոպյանն ու նրա դուստրը` Արմիկը, որդին` Մեսրոպը։ Զոհեր կան նաև Անտիոքում` Անտուան Հորոսը, Տիգրանակերտում` Զիլան Տիգրիսը, Ադիյամանում` Աոննա Կարոլինա Կապը։
«Մենք այլ տվյալներ էլ ունենք, բայց դրանք այժմ ճշգրտում ենք ու կհայտնենք, եթե հաստատվեն»,– հայտարարել է Ալեքսանյանը` հավելելով, որ և՛ Սիրիայի, և՛ Թուրքիայի հայ համայնքներում նաև տուժածներ կան, սակայն դեռևս հստակ թվեր չեն նշվում։
Բացի այդ Ալեքսանյանը նշել է, որ կատարվում է նաև համայնքային կառույցների և եկեղեցու կորուստների հաշվառում:
Թողնել պատասխան