Իրանի Նորդուզ սահմանային անցակետում ՀՀ պետական եկամուտների կոմիտեի նախագահի տեղակալ Աշոտ Մուրադյանը հանդիպել է Իրանի մաքսային ծառայության ղեկավարի տեղակալ Իբրահիմ Նաղդիի գլխավորած պատվիրակության հետ: Այդ մասին հաղորդում է ՀՀ ՊԵԿ-ի մամուլի ծառայությունը։
Տարածած հաղորդագրությունում նշվում է, որ քննարկվել են երկու երկրների միջև առևտրաշրջանառության զարգացման խթանման նպատակով Մեղրիի և Նորդուզ անցումային կետերում գործընթացների առավել դյուրին և սահուն իրականացմանը վերաբերող հարցեր:
Դիտարկվել է երկու երկրների մաքսակետերում ծագող խնդիրների արագ ու արդյունավետ լուծման, միջազգային փոխադրումներին առնչվող էլեկտրոնային տվյալների փոխանակման համակարգի գործարկմանը վերաբերող հարցեր:
Հայ և իրանցի գործընկերները պայմանավորվել են ակտիվացնել երկու երկրների մաքսային ծառայությունների գործակցությունը, ինչը դրական կանդրադառնա մաքսային կանոնների խախտման դեպքերի բացահայտման և խնդիրների առավել արագ լուծման գործընթացի վրա:
Կողմերը պատրաստակամություն են հայտնել նաև պարբերական դարձնել բարձր մակարդակի հանդիպումները՝ երկու բարեկամ երկրների մաքսային ծառայության ոլորտին առնչվող ընթացիկ խնդիրներին օպերատիվ լուծումներ տալու նպատակով:
Թողնել պատասխան