Իզմիրլյան բժշկական կենտրոնում մահացել է գեներալ, ՀՀ ԱԺ նախկին պատգամավոր Սեյրան (Սեդրակ) Սարոյանը։
Սեյրան Սարոյանը ծնվել է 1967թ. սեպտեմբերի 3-ին Էջմիածնի շրջանի Հայկաշեն գյուղում:
1993թ. ավարտել է ՀՀ պաշտպանության նախարարության բարձրագույն ակադեմիական կուրսերը, 1996թ.` Հունաստանի ցամաքային զորքերի ակադեմիական դասընթացները, 2001թ.` ՌԴ զինված ուժերի գլխավոր շտաբի ռազմական ակադեմիայի ակադեմիական դասընթացները: 2006թ. ավարտել է ՌԴ զինված ուժերի գլխավոր շտաբի ռազմական ակադեմիան` «Պետության ռազմական անվտանգություն» մասնագիտությամբ:
1985-1987թթ. ծառայել է խորհրդային բանակում:
Ղարաբաղյան շարժման ակտիվ մասնակիցներից է: 1989թ. ստեղծել է կամավորական ջոկատ, պաշտպանել Հայաստանի սահմանամերձ շրջանները, մարտնչել Արցախի ազատագրության համար: Նրա հրամանատարությամբ գործող ջոկատը, հետագայում «Արծվիկ-10» գումարտակը և օպերատիվ խումբը մարտնչել են Քարվաճառի (Քելբաջար), Որոտանի (Կուբաթլի), Կովսականի (Զանգելան) ազատագրման ճակատամարտերում: 1993-2007թթ. եղել է ՀՀ զինված ուժերում գնդի, բրիգադի, բանակային 2-րդ, ապա 4-րդ կորպուսի հրամանատար:
2000թ. նրան շնորհվել է գեներալ-մայորի կոչում:
ՀՀ Նախագահի կողմից պարգեւատրվել է «Արիության մեդալ» (1994թ.), «Մարտական խաչ» երկրորդ աստիճանի (1996թ.) եւ «Հայրենիքին մատուցված ծառայությունների համար» առաջին աստիճանի (2006թ.) մեդալներով, ՀՀ պաշտպանության նախարարի կողմից` «Մարշալ Բաղրամյան» (1997թ.), «Դրաստամատ Կանայան» (2002թ.), «Անբասիր ծառայության համար» առաջին եւ երկրորդ աստիճանի (2003թ., 2004թ.) մեդալներով:
2007թ. մայիսի 12-ին Ազգային ժողովի պատգամավոր է ընտրվել թիվ 19 ընտրատարածքից: 2018 թ․ հեռացել է ՀՀԿ-ից և քաղաքականությունից։
Երբ 2016թ.-ին Արցախի Հանրապետությունում սկսվեց Ապրիլյան քառօրյա պատերազմը, բազմաթիվ կամավորականների նման գեներալ Սեյրան Սարոյանը իր զինակից ընկերների հետ մեկնեց Քարվաճառ և Դադիվանքի հոգևոր հովիվ Տեր Հովհաննես քահանա Հովհաննիսյանի հետ ուս-ուսի տված անառիկ պահեցին ոչ միայն Քարվաճառի դիրքերը, այլ նաև Դադիվանքը:
Թողնել պատասխան