Պաշտոնական Երևանը և ֆրանսիական KNDS ռազմարդյունաբերական ընկերությունը «Սեզար» հրետանային համակարգերի ձեռքբերման պայմանագիր են ստորագրել։ Այդ մասին X-ի իր միկրոբլոգից հայտնել է Ֆրանսիայի պաշտպանության՝ պայմանագրի կնքումը կարևոր իրադարձություն որակելով։
Ֆրանսիայի պաշտպանության նախարարությունն ընդգծում է, որ Հայաստանին մատակարարվող տեխնիկան պաշտպանական բնույթ է կրում: Հայաստանի անվտանգության համար մշտական սպառնալիքների և մարտահրավերների պայմաններում այդ մատակարարումները կօգնեն ամրապնդել երկրի պաշտպանական կարողությունները և ապահովել ինքնիշխանության պաշտպանությունը։
Նշված գործարքն անտարբեր չի թողել ադրբեջանական կողմին և չի ուշացել նրանց հերթական մեղադրանքները։ Այս անգամ պաշտոնական Բաքուն հայտարարել է, որ Հարավային Կովկասում «պատերազմի նոր օջախ ստեղծելու ողջ պատասխանատվությունը կրելու են Հայաստանի ղեկավարությունը և Մակրոնի բռնապետությունը»։
«Չնայած ադրբեջանական կողմի նախազգուշացմանը, Ֆրանսիան Հայաստանին մահաբեր և հարձակողական հրետանի և այլ զինատեսակներ է մատակարարում, ինչը Հարավային Կովկասի տարածաշրջանում Ֆրանսիայի սադրիչ գործողությունների հերթական ապացույցն է», — նշված է Ադրբեջանի ՊՆ-ի հայտարարության մեջ։
Հավելենք նաև, որ Le Point պարբերականի փոխանցմամբ Ֆրանսիայի մի շարք քաղաքական և հասարակական գործիչներ նախագահ Էմանուել Մակրոնին ուղղված բաց նամակ են ստորագրել` կոչ անելով խաղաղապահ զորակազմ ուղարկել Հայաստան:
«Ցավոք, դա կարող է բավարար չլինել Ալիևի վարչակարգը էքսպանսիոնիստական և հանցավոր ծրագրերից հետ պահելու համար։ Ադրբեջանը, հենվելով ռազմական առավելության վրա, նավթագազային եկամուտների և Թուրքիայի աջակցության շնորհիվ, տրամադրված է ռազմական էսկալացիայի, հատկապես Ղարաբաղում «հաջողված» էթնիկ զտումներից հետո։ Դա բարդացրել է Հայաստանի հարաբերություններն իր ավանդական դաշնակից Ռուսաստանի հետ»,-ասվում է հայտարարության մեջ։
Նամակի հեղինակները «վատագույն սցենարից խուսափելու համար», առաջարկում են ցույց տալ Հայաստանին աջակցելու օրինակ` հնարավոր ագրեսորների ախորժակը զսպելու համար։
Թողնել պատասխան