Արցախում դեմ Ադրբեջանի կողմից սանձազերծված լայնամասշտաբ հարձակման հետևանքով առնվազն 200 մարդ է զոհվել։ Այդ մասին X–ի իր միկրոբլոգից հայտնում է Արցախի մարդու իրավունքների պաշտպան Գեղամ Ստեփանյանը` հավելելով, որ ավելի քան 400 մարդ էլ վիրավոր է։
«Սեպտեմբերի 20-ին՝ ժամը 21:30-ի դրությամբ, Մարդու իրավունքների պաշտպանի գրասենյակի կողմից հավաքագրված տեղեկատվության համաձայն, կա առնվազն 200 զոհ և ավելի քան 400 վիրավոր»,– նշում է պաշտպանը։
Ստեփանյանը նշել է նաև զոհերի և վիրավորների թիվը քաղաքացիական բնակչության շրջանում։ Արցախի ՄԻՊ–ի վերջին տեղեկություններով` խաղաղ բնակիչների շրջանում վիրավորների թիվը գերազանցում է 40–ը, որոնցից 13-ը երեխաներ են: Այս պահի դրությամբ հաստատվել է քաղաքացիական անձանց մահվան 10 դեպք, նրանցից 5-ը երեխաներ են։
Արցախի մարդու իրավունքների պաշտպանի գրասենյակը շարունակում է նաև փաստահավաք գործունեությունը անհայտ կորածների ճակատագրի պարզման համար։
Թողնել պատասխան