Ագրեսորին կոչ ենք անում անհապաղ դադարեցնել բախումները: Որևէ հակամարտություն ռազմական լուծում չի կարող ունենալ։ Նման հայտարարությամբ է հանդես եկել ՄԱԿ-ում Հնդկաստանի ներկայացուցիչ Ռուչիրա Կամբոջան։
«Ագրեսոր կողմին կոչ ենք անում անհապաղ դադարեցնել բախումները եւ զսպվածություն ցուցաբերել։ Այս գործողությունները լուրջ սպառնալիք են տարածաշրջանի խաղաղության եւ կայունության համար։ ՄԱԿ-ի ԱԽ-ն չի կարող լռել եւ թույլ տալ իրավիճակի վատթարացում»,- ասել է նա։
Հիշեցնենք, որ Հնդկաստանի կառավարության արտաքին գործերի նախարարության պաշտոնական խոսնակ Արինդամ Բագչին հայտարարել էր, որ երկկողմ վեճերը պետք է լուծվեն դիվանագիտության և երկխոսության միջոցով՝ ագրեսոր կողմին կոչ անելով դադարեցնել մարտական գործողությունները։
«Մենք տեսել ենք հաղորդումներ հայ-ադրբեջանական սահմանի երկայնքով հարձակումների մասին, ներառյալ՝ քաղաքացիական բնակավայրերի և ենթակառուցվածքների վրա հարձակումները սեպտեմբերի 12/13-ին։ Մենք ագրեսոր կողմին կոչ ենք անում անհապաղ դադարեցնել մարտական գործողությունները»,- նշված է գերատեսչության տարածած պաշտոնական հաղորդագրության մեջ։
Հնդկաստանը կոչ է անում երկու կողմերին շարունակել բանակցությունները՝ կայուն և խաղաղ լուծման հասնելու համար։
Հավելենք նաև, որ Ադրբեջանի ԱԳՆ մամուլի խոսնակ Լեյլա Աբդուլլաևան` անդրադառնալով Հնդկաստանի ԱԳՆ կոչին, չի հասկացել, թե կոնկրետ ով է ագրեսորը:
«Մենք կարող ենք մեկնաբանել այս հարցը, եթե պարզ դառնա, թե ով է ագրեսորը հայտարարության մեջ»,- շեշտել է նա պատասխանելով լրատվամիջոցների հարցմանը։
Թողնել պատասխան