ԱՀ ԿԳՍ նախարար Նարինե Աղաբալյանի ուղերձը Գիտելիքների օրվա առթիվ

40523296_311330752964031_2732454362604371968_n

Այսօր սեպտեմբերի 1-ն է՝ Գիտելիքի, գրի և դպրության օրը: Արցախի դպրոցներում և այլ ուսումնական հաստատություններում վերսկսվել են դասերը: 

Նոր ուսումնական տարում առաջին դասարան է հաճախելու 2․441 աշակերտ.

Արցախի Հանրապետության Կրթության, Գիտության և Սպորտի նախարար Նարինե Աղաբալյանը  տոնի առթիվ ուղերձ է հղել․

“Սիրելի աշակերտներ, ուսուցիչներ, ծնողներ
Սիրելի ուսանողներ ու դասախոսներ
Շնորհավորում եմ բոլորիդ նոր ուսումնական տարվա մեկնարկի առիթով:
Սեպտեմբերի 1-ը տոն է բոլորիս համար և առաջին զանգի ղողանջների հետ մեր կյանքը կարծես լցվում է ժպիտներով ու վառ գույներով, նոր իմաստով ու բովանդակությամբ:
Պատմական իրադարձություններով պայմանավորված Արցախում գիտելիքի, դպրության և Հանրապետության հռչակման տոները համընկել են, և արդեն 27-րդ անգամ նոր ուսումնական տարվա մեկնարկը մեր երկրում տրվում է անկախության դասով: Մեծ խորհուրդ կա սրա մեջ, որովհետև երեկ, այսօր և վաղը՝ մեր բոլոր սերունդների համար ամենակարևոր դասը եղել է, կա և պետք է լինի՝ ամուր պահել հայոց պետության հիմքերը և մեր գիտելիքներով, տքնաջան աշխատանքով ու հայրենիքին մեր ծառայությամբ ամեն օր մի քար ավելացնել այդ հիմքի վրա, քանզի պետականությունն է, որ երաշխավորում է անվտանգություն, կրթության, աշխատանքի և զարգացման հնարավորություն:
1991-ի սեպտեմբերի 2-ին հռչակված անկախությունը և անհավասար պատերազմում արժանապատիվ հաղթանակը ապահովեցին մեր երեխաների համար բարեկարգ դպրոցներում սովորելու հնարավորություն:
Իհարկե, տասնյակ դպրոցներ դեռ շարունակում են կրել պատերազմի հետքը և կարոտ են շինարար ձեռքի: Սակայն, անկախության տարիների դպրոցաշինության ակտիվ ընթացքը հուշում է, որ նոր ու հիմնանորոգված դպրոցների թիվը տարեցտարի ավելանալու է:
Սիրելի աշակերտնե՛ր
Այսօր գուցե ավելի, քան երբևէ կարևորվում է գիտելիքը և գիտելիքի հետ միասին անձնային որակների ու կարողությունների զարգացումը:
Տեղեկատվական-հաղորդակցական տեխնոլոգիաների այս դարում կյանքը շատ արագ է փոփոխվում, հետևապես, ամեն օր մեր առջև նոր մարտահրավերներ ու նոր խնդիրներ են ծառանում: Այդ փոփոխությունները պիտի արտացոլվեն նաև կրթության մեջ, հետևապես, մենք պիտի կարողանանք լինել ավելի ճկուն և քայլենք ժամանակին համընթաց:
Սիրելի ծնողնե՛ր
Մենք ունենք հրաշալի ուսուցիչներ, ովքեր անմնացորդ նվիրումով են կատարում իրենց առաքելությունը, ովքեր կրթում ու դաստիարակում են արժանապատիվ սերունդ, յուրաքանչյուր աշակերտի մեջ բացահայտելով անհատին և ճանապարհ հարթելով դեպի մեծ ապագա:
Սիրելի ուսուցիչնե՛ր
Ձեզ հետ միասին մենք շարունակելու ենք նոր հնարավորություններ ստեղծել մեր երեխաների համար և, վստահաբար, հպարտանալու ենք նրանց ձեռքբերումներով ու նոր հաղթանակներով:
Դրոցական զանգն այսօր ղողանջեց մեր հանրապետության 24369 դպրոցականների համար, նրանցից շուրջ 2441-ի համար՝ առաջին անգամ:
Շնորհավորում եմ բոլորին և մաղթում հետաքրքիր ու լուսավոր ճանապարհ մեր աշակերտներին՝ գիտելիքների զարմանահրաշ աշխարհում, անսպառ ուժ ու կորով մեր ուսուցիչներին՝ իրենց պատվաբեր ու պատասխանատու առաքելության մեջ, խաղաղություն ու բարգավաճում՝ մեր երկրին”:

Արցախի կրթության, գիտության և սպորտի նախարարության ֆեյսբուքյան էջից։

Դիտումների քանակը: 4901
Հետրեք մեզ telegram-ի միջոցով: @arcakh24
Մեկնաբանել կայքում
մեկնաբանւթյուն

Թողնել պատասխան

Ձեր էլ-փոստի հասցեն չի հրապարակվելու։

Հեղինակի մասին