Ադրբեջանի նախագահ Իլհամ Ալիևի այսօրվա ստորագրած հրամանագրի համաձայն երկիրը բաժանվել է տնտեսական շրջանների։ Դրանց կազմում են նաև Արցախի այն տարածքները, որոնք գտնվում են հայկական վերահսկողության տակ: Այդ մասին նշվում է Ադրբեջանի նախագահի պաշտոնական կայքում։
Ադրբեջանի նոր բաժանումը, ըստ աղբյուրի, կապված է «նշված տարածքների հավասար զարգացման ապահովման հետ՝ դրանց հարուստ տնտեսական ներուժի, բնական ռեսուրսների և զբոսաշրջային լայն հնարավորությունների արդյունավետ օգտագործմամբ»:
Նշենք, որ ընդամենը 14 շրջան է լինելու։
Մասնավորապես՝ այսպես կոչված Ղարաբաղյան տնտեսական շրջան են մտել Աղդամի (Ակնա), Շուշիի, Ֆիզուլիի (Վարանդա), Թարթառի, Խոջավենդի (Մարտունի), Խոջալուի (Իվանյան), Աղջաբեդի և Բարդինի շրջանները և նույնիսկ Ստեփանակերտ քաղաքը։
Այսպես կոչված արևելազանգեզուրյան շրջան են մտել Ջաբրայիլի (ԼՂՀ–ի Հադրութի շրջան), Քելբաջարի (Շահումյանի շրջանի մի մասը), Կուբաթլուի, Լաչինի և Զանգելանի շրջանները (Քաշաթաղի շրջան)։
Փաստաթղթում նշվում է, որ Ադրբեջանի տնտեսության մեջ վերահսկողության տակ անցած տարածքների վերաինտեգրումն ապահովելու համար պետք է հզորացվեն նաև Գյանջա-Ղազախ և Արանի տնտեսական շրջանները։
Թողնել պատասխան