Հոկտեմբերի 21- ին ԱՀ Շուշի և Ֆրանսիայի Սենտ Էտիեն քաղաքների միջև ստորագրվել է Բարեկամության հռչակագիր:
Այն ստորագրել են Շուշիի քաղաքապետ Արծվիկ Սարգսյանը և Սենտ Էտիեն քաղաքի քաղաքապետ, «Ֆրանսիա—Արցախ» Բարեկամության շրջանակի անդամ Գաել Պերդրիոն:
Ըստ Արցախի Հանրապետության Արտաքին գործերի նախարարության մամուլի ծառայության՝ ստորագրման հանդիսավոր արարողությանը ներկա էին ԱՀ ԱԳՆ Մասիս Մայիլյանը և «Ֆրանսիա—Արցախ» Բարեկամության շրջանակի նախկին ղեկավար, Ֆրանսիայի Ազգային ժողովի նախկին պատգամավոր Ֆրանսուա Ռոշբլուանը:
“Հիմք ընդունելով Մարդու իրավունքների համընդհանուր հռչակագրում ամրագրված ազատության և ժողովրդավարական արժեքների բացարձակ կարևորությունը և Հարավային Կովկասում կայունություն և խաղաղություն հաստատելուանհրաժեշտությունը՝ կողմերը որոշում են երկու քաղաքների միջև բարեկամական կապեր հաստատել, համատեղ ծրագրեր իրականացնել տնտեսության կրթության, մշակույթի, սպորտի ու տեղական ինքնակառավարման ոլորտներում, ինչպես նաև նպաստել երկու քաղաքների միջև փորձի և մասնագիտական հմտությունների փոխանակմանը”,- նշված է հռչակագրի մեջ։
Թողնել պատասխան