ՀՀ ԱԽ քարտուղար Արմեն Գրիգորյանը չի բացառում, որ Ադրբեջանի հետ խաղաղության պայմանագիր կնքվի առանց ԼՂ հարցի վերջնական լուծման: Վերջինս նման կարծիք է հայտնել «Արմենպրեսին» տված հարցազրույցում։
Այն հարցին, թե հնարավո՞ր է Ադրբեջանի հետ խաղաղության պայմանագիր կնքել առանց ԼՂ հարցի վերջնական լուծման, Գրիգորյանը պատասխանել է, որ նման գաղափար նույնպես կա:
«Բայց այս պահին վաղ է որևէ նման բանաձևի մասին խոսել»,- ըստ աղբյուրի նշել է Գրիգորյանը։
Ինչ վերաբերում է արցախցիների անվտանգության երաշխիքներին, ապա Արմեն Գրիգորյանը նշել է, որ ՌԴ խաղաղապահ զորակազմի ներկայությունն է այդ երաշխիքը: Սակայն, ըստ նրա, ԼՂ հիմնախնդրի դեմիլիտարիզացիան կարևոր գաղափար է:
«Մենք բազմիցս ենք ասել, որ Ղարաբաղի հիմնախնդիրը մեզ համար տարածքային հարց չէ: Այդ առումով մեզ համար սկզբունքային է Ղարաբաղի հայության անվտանգությունն ու իրավունքները: Վարչապետ Նիկոլ Փաշինյանն ԱԺ-ում ունեցած ելույթներից մեկում նշեց, որ կա գաղափար՝ ԼՂ հարցը տարանջատել Հայաստան-Ադրբեջան հարաբերություններից: Մենք հիմա ակտիվորեն պիտի քննարկենք այդ տարբերակը և որոշենք ինչպես առաջ ընթանալ»,- հավելել է ՀՀ ԱԽ քարտուղարը։
Հարցին, թե Հայաստանը պատրա՞ստ է Ադրբեջանի հետ խաղաղության պայմանագիր կնքել` Արմեն Գրիգորյանն ասել է, որ կարծում է` իրենք ընթանում են այդ ճանապարհով:
Անդրադառնալով Ադրբեջանի տարածքային ամբողջականության ճանաչմանը` Գրիգորյանը նշել է, որ Հայաստանն Ադրբեջանի տարածքային ամբողջականությունը ճանաչում է հենց թեկուզ այն փաստի բերումով, որ դա մեր օրենսդրության մաս է: ԱԽ քարտուղարը հիշեցրել է, որ քանիցս ասել են` Հայաստանն ու Ադրբեջանը միմյանց տարածքային ամբողջականությունն ու սահմանների անխախտելիությունը ճանաչել են դեռևս 1991 թվականին ստորագրված և հետագայում վավերացրած ԱՊՀ ձևավորման մասին համաձայնագրով: Ուստի, հայկական կողմի համար, ըստ Գրիգորյանի, անընդունելի ոչինչ չկա, և Հայաստանն Ադրբեջանից տարածքային պահանջներ չունի:
Ինչ վերաբերում է սահմանազատման գործընթացին, ապա Գրիգորյանը հայտնել է, որ օգոստոսի երկրորդ կեսին նախատեսված է սահմանագծման և սահմանային անվտանգության հարցերով հանձնաժողովի երկրորդ նիստը Մոսկվայում։ Նա վստահեցրել է, որ հանձնաժողովի նիստը օգոստոսի երկրորդ կեսին նշանակվել է ադրբեջանական կողմի առաջարկով. հայկական կողմը երկրորդ հանդիպմանը պատրաստ էր և՛ հունիսին, և՛ հուլիսին: Իսկ, ահա, կոմունիկացիաների հարցով եռակողմ աշխատանքային խմբում, որ համանախագահում են ՌԴ-ն, Հայաստանի և Ադրբեջանի փոխվարչապետները, Գրիգորյանի գնահատմամբ, որոշակի առաջընթաց կա և տրամադրված են շարունակել նույն ոգով:
Թողնել պատասխան