Բժիշկների համաշխարհային ասոցիացիան (World Medical Association) Հայաստանում հումանիտար ճգնաժամում հայտնված հազարավոր քաղաքացիական անձանց օգնելու հրատապ գործողությունների կոչ է անում: Այդ մասին հայտարարություն է տարածվել WMA պաշտոնական կայքէջում։
Կազմակերպությունը նշում է, որ ճգնաժամը Արցախը Հայաստանին կապող Լաչինի միջանցքի արգելափակման հետևանք է, որը հանգեցրել է ավելի քան 120 հազար մարդու՝ բժշկական օգնությունից զրկվելուն:
«Արդյունքում, հազարավոր մարդիկ Լեռնային Ղարաբաղի Հանրապետությունում չեն կարողանում ստանալ պարենի մատակարարումներ ու բժշկական օգնություն, իսկ տարածքում գտնվող հիվանդները չեն կարողանում տեղափոխվել Հայաստանի մայրաքաղաք Երևանի հիվանդանոցներ»,- նշված է հաղորդագրությունում:
WMA խորհրդի նախագահ Ֆրանկ Ուլրիխ Մոնտգոմերին հայտարարել է.- «Հիվանդները մահվան վտանգի տակ են, քանի որ չեն կարողանում ստանալ իրենց դեղորայքը և չեն կարող հասնել հիվանդանոց: Մենք կոչ ենք անում Ադրբեջանի կառավարությանն անհապաղ ապահովել անվտանգ անցումը Լաչինի միջանցքով՝ հումանիտար ճգնաժամի վատթարացումից խուսափելու համար։ Սա կարևորագույն ճանապարհ է կենսական նշանակություն ունեցող պարենի և բժշկական պարագաների մատակարարումների համար»:
Թողնել պատասխան