Հայկական կողմն այսօրվա դրությամբ ունի 105 զոհ. Փաշինյան

Այս պահին հայկական կողմն ունի 105 զոհ։ Այդ մասին Կառավարության հետ հարցուպատասխանի ժամանակ հայտնեց ՀՀ վարչապետ Նիկոլ Փաշինյանը։

«Երբ ասում ենք, որ Ադրբեջանն ագրեսիա է իրականացրել Հայաստանի նկատմամբ, նկատի ունենք, որ նաև որոշակի տարածքի նկատմամբ հսկողություն է սահմանել, ինչի համար էլ դիմել ենք ՀԱՊԿ-ին»,–ասաց Փաշինյանը` հավելելով, որ Հայաստանը ՀԱՊԿ–ին է դիմել 4-րդ հոդվածով։

«4-րդ հոդվածը սահմանում է, որ ՀԱՊԿ անդամ երկրներից մեկի նկատմամբ ագրեսիան համարվում է ագրեսիա մյուս երկրների նկատմամբ։ ՀԱՊԿ–ից Հայաստանը խնդրել է օգնություն, այդ թվում` ռազմական՝ Հայաստանի տարածքից ադրբեջանական ԶՈւ–ի դուրսբերումն ապահովելու համար»,– նշել է նա։

Հայաստանի տարածքից ադրբեջանական ԶՈւ–ի դուրսբերում ասելով, ըստ Փաշինյանի, նկատի են ունեցել նաև նախորդ տարվա մայիսի 12-ին Սոթք–Խոզնավար հատվածում տեղի ունեցած ներխուժումը. «Եվ սա մենք ֆիքսում ենք` որպես քաղաքական նպատակ, որ ագրեսորը պետք է ՀՀ տարածքից դուրս գա։ Եվ սա է մեր խնդիրը, այդ թվում` ՀԱՊԿ–ում մեր նախաձեռնության իմաստով»։

Փաշինյանի գնահատմամբ` ՀԱՊԿ–ի նիստ կազմակերպելը գոհացուցիչ փաստ էր, իսկ նիստին անկեղծ ու բաց քննարկում է տեղի ունեցել։ Նրա խոսքով` նվազագույն անհրաժեշտ որոշումներ են կայացվել այս փուլի համար։
Փաշինյանը կարծիք հայտնեց, որ երեկ ՀԱՊԿ ԱԽ նիստում սկիզբ է դրվել մի գործընթացի, որը պետք է իր կոնկրետ լուծումներն ունենա։

«Այնուամենայնիվ, երեկվա նիստում մեր գործընկերների կողմից հնչել են հստակ գնահատականներ, որ Ադրբեջանի ԶՈւ–ն ներխուժել է ՀՀ ինքիշխան տարածք։ Եթե այդ ֆորմատում այդպիսի նախադասություն է հնչում, այդ նախադասությունը չպիտի մնա անհետևանք»,– ասաց նա։

Փաշինյանը միաժամանակ նշեց, որ ՀԱՊԿ–ից ակնկալում են ոչ միայն ռազմական, այլև դիվանագիտական աջակցություն։

Հիշեցնենք, որ այսօր Ադրբեջանի ռազմագերիների, անհետ կորածների և պատանդների հարցերով պետական հանձնաժողովը հայտարարել է, որ «Բաքուն պատրաստ է Հայաստանին հանձնել վերջին երկու օրերին զոհված շուրջ 100 հայ զինծառայողների մարմինները»։

Դիտումների քանակը: 3601
Հետրեք մեզ telegram-ի միջոցով: @arcakh24
Մեկնաբանել կայքում
մեկնաբանւթյուն

Թողնել պատասխան

Ձեր էլ-փոստի հասցեն չի հրապարակվելու։

Հեղինակի մասին