ԱՄՆ Սենատի արտաքին հարաբերությունների հարցերով հանձնաժողովի նախագահ Ռոբերտ Մենենդեսը սեպտեմբերի 30-ին հանդես է եկել ևս երկու նախաձեռնությամբ։ Այդ մասին հայտնում է ՀՅԴ Բյուրոյի Հայ դատի կենտրոնական գրասենյակը։
Մենենդեսն օրերս ԱՄՆ Սենատին բանաձևի նախագիծ էր ներկայացրել, որը դատապարտում է Ադրբեջանի հարձակումը Հայաստանի վրա:
«Մենենդեսի նոր նախաձեռնությունը կարգավորումներ է ենթադրում 2023թ. ֆիսկալ տարվա «Ազգային պաշտպանական արտոնությունների ակտում», որոնք ԱՄՆ նախագահին զրկում են «907-րդ բանաձևի» կիրարկումից հրաժարվելու հնարավորությունից և արգելափակում Թուրքիային F-16 կործանիչների ու դրանց արդիականացման համակարգերի վաճառքը։ Սա ուղղակիորեն կզրկի Ադրբեջանին ամերիկյան ռազմական օժանդակությունից»,– նշված է հաղորդագրության մեջ։
Նախաձեռնության առթիվ Հայ դատի Ամերիկայի հանձնախմբի Վաշինգտոնի գրասենյակի գործադիր տնօրեն Արամ Համբարյանը շնորհակալություն հայտնելով սենատոր Մենենդեսին Հայաստանի և Արցախի համար փաստացի վտանգներ ստեղծող Թուրքիայի և Ադրբեջանի նկատմամբ նման նախաձեռնության համար նշել է` ներկայացված միջոցառումներն օրենսդրորեն կապահովեն, որ ԱՄՆ-ն այդ ուժերից որևէ մեկին չուղարկի զենք և ամերիկյան հարկերից գոյացած միջոցներ։
Թողնել պատասխան