ՀՀ վարչապետ Նիկոլ Փաշինյանը հայ-ադրբեջանական սահմանի լարվածության աճի միտումները քննարկել է Գերմանիայի Դաշնային Հանրապետության կանցլեր Օլաֆ Շոլցի հետ: Այդ մասին հայտնում են ՀՀ վարչապետի մամուլի ծառայությունից։
«Զրուցակիցները քննարկել են Լաչինի միջանցքի [Բերձորի միջանցք] ապօրինի արգելափակման հետևանքով Լեռնային Ղարաբաղում հումանիտար ճգնաժամի խորացման, Լեռնային Ղարաբաղի շուրջ ադրբեջանական զորքերի կուտակման, Հայաստան-Ադրբեջան պետական սահմանին լարվածության աճի միտումներին վերաբերող հարցեր»,– նշված է հաղորդագրությունում:
Հեռախոսազրույցի ընթացքում Փաշինյանը վերահաստատել է իր հավատարմությունը բոլոր հարցերը բացառապես դիվանագիտական ճանապարհով ու կառուցողական մթնոլորտում կարգավորելու մոտեցումներին՝ հիմք ընդունելով 2022 թվականի հոկտեմբերի 6-ին Պրահայում և 2023 թվականի մայիսի 14-ին Բրյուսելում ձեռք բերված պայմանավորվածությունները։
Համաձայն աղբյուրի Շոլցը նշել է, որ պատրաստակամ է աջակցել տարածաշրջանում խաղաղության և կայունության հաստատմանն ուղղված ջանքերին:
Փաշինյանն ընդգծել է, որ պատրաստ է լարվածությունը նվազեցնելուն միտված հրատապ քննարկումներ ունենալ Ադրբեջանի նախագահի հետ:
Հավելենք, որ Փաշինյանը զրուցել է նաև Ֆրանսիայի նախագահ Էմանուել Մակրոնի հետ և նույն հայտարարությունն արել նրա հետ զրույցում։
Ավելի վաղ ֆրանսիական լրատվամիջոցները, հղում անելով Ելիսեյան պալատին, հայտնել էին, որ Ֆրանսիայի նախագահ Էմանուել Մակրոնը Փաշինյանի հետ քննարկել է հայ-ադրբեջանական սահմանին աճող լարվածության հարցը:
«Քննարկվել են Լաչինի միջանցքի [Բերձորի միջանցք] ապօրինի արգելափակման հետևանքով Լեռնային Ղարաբաղում խորացող հումանիտար ճգնաժամին, Լեռնային Ղարաբաղի շուրջ ադրբեջանական զորքերի կուտակման, Հայաստան-Ադրբեջան պետական սահմանին լարվածության աճի միտումներին վերաբերող հարցեր»,– ասված է ՀՀ վարչապետի մամուլի ծառայության հաղորդագրության մեջ:
Թողնել պատասխան