Ադրբեջանի նախագահ Իլհամ Ալիևը Միացյալ նահանգների պետքարտուղար Էնթոնի Բլինքենի հետ հեռախոսազրույցում ևս առաջ է քաշել Լաչինի միջանցքում [Բերձորի միջանցք] անցակետ տեղադրելու «անհրաժեշտությունը»` մեղադրելով հայկական կողմին, թե իբր հայկական կողմը շարունակում է ռազմական փոխադրումները Արցախ։
«Ճանապարհի շրջափակումը Հայաստանի կեղծ քարոզչությունն է»,- ըստ Բաքվի՝ ասել է Ալիևը՝ ամերիկացի պաշտոնյային տեղեկացնելով, որ անցած 100 օրերին ռուս խաղաղապահները և Կարմիր խաչի միջազգային կոմիտեն ապահովել են ավելի քան 4700 մեքենաների տեղաշարժը։
Բացի այդ Ալիևը հայտարարել է, թե վերջին շաբաթներին հայկական կողմը, չարաշահելով Եվրամիության առաքելության տեղակայումը, միտումնավոր սրում է իրավիճակը, խախտում հրադադարը։ Ալիևն ասել է, որ պատրաստ է մոտ ապագայում ստորագրել խաղաղության համաձայնագիրը, որի տեքստը վերջին առաջարկություններով և փոփոխություններով արդեն ներկայացվել է հայկական կողմին։ Ադրբեջանի նախագահը նաև հիշեցրել է, որ Ղարաբաղի հայերը Բաքու այցելելու հրավեր են ստացել՝ «քննարկելու ինտեգրացիան և ենթակառուցվածքները»։
«Այսօր խոսել եմ Ադրբեջանի նախագահ Ալիևի հետ, որ արտահայտեմ իմ աջակցությունը Հայաստանի հետ կայուն խաղաղությանը և այդ ջանքերին աջակցելու մեր պատրաստակամությունը։ Ուղիղ բանակցությունները տևական խաղաղության հասնելու միակ միջոցն են»,- թվիթերյան իր միկրոբլոգում գրել է ԱՄՆ պետքարտուղարը։
Բաքուն հաղորդում է, որ այն ամերիկյան կողմի նախաձեռնությամբ է տեղի ունեցել:
Հիշեցնենք, որ երեկ էլ պետքարտուղար Բլինքենը զանգահարել էր ՀՀ վարչապետ Նիկոլ Փաշինյանին։
Թողնել պատասխան