Ադրբեջանական կողմը քիչ առաջ փակել է Արցախ-Հայաստան սահմանագծին գտնվող Հակարի գետի կամուրջը։ Այդ մասին հայտնում են Արցախի տեղեկատվական շտաբից` նշելով, որ կամուրջը գտնվում է ՌԴ խաղաղապահ զորակազմի պատասխանատվության տիրույթում՝ «Լաչինի միջանցքում» [Բերձորի միջանցք]:
Այդ իսկ պատճառով Ստեփանակերտում հրավիրել է Անվտանգության խորհրդի հրատապ նիստ, որտեղ քննարկվելու են վերջին զարգացումները և ԱՀ իշխանությունների համապատասխան անելիքները։
«Արցախի Հանրապետության իշխանությունները խստորեն դատապարտում են ադրբեջանական հերթական սադրանքը՝ այն համարելով Արցախի շրջափակումը խորացնող և էթնիկ զտմանը միտված հանցավոր քայլ, որը ոտնահարում է թե՛ եռակողմ հայտարարությունը, թե՛ ՄԱԿ-ի Արդարադատության միջազգային դատարանի պարտադիր կատարման ենթակա որոշումը և թե՛ միջազգային իրավունքի այլ հիմնարար նորմեր»,- նշված է հաղորդագրության մեջ։
Հիշեցնենք, որ ապրիլի 22-ին Շուշիի շրջանի օկուպացված հատվածում ադրբեջանական բեռնատար էր պայթել, ինչի համար ադրբեջանական կողմը կրկին մեղադրել է Հայաստանին` նշելով, որ նշված տարածքում հայտնաբերվել են 2021 թվականի արտադրության հակատանկային և հակահետևակային ականներ։
Այդ հաղորդագրությունը ԱՀ ԱԳՆ-ն որակել է սադրիչ` նշելով, որ Շուշիի շրջանում թե իբր հայկական կողմի հատուկ տեղադրած ականների վրա է պայթել ադրբեջանական բանակի ռազմական բեռնատարը, բացարձակ սուտ է և չի համապատասխանում իրականությանը:
Թողնել պատասխան