Հայաստանը տրամադրված է և պատրաստ է Ադրբեջանի հետ խաղաղության համաձայնագրի ստորագրմանը։ Այդ մասին Անկարայում Սևծովյան տնտեսական համագործակցության խորհրդարանական վեհաժողովից հետո լրագրողների հետ հանդիպման ժամանակ հայտնել է ՀՀ ԱԺ նախագահ Ալեն Սիմոնյանը` վստահեցնելով, որ Հայաստանը տարածքային պահանջներ չունի Ադրբեջանի նկատմամբ։
«Մենք պատրաստ ենք և շահագրգռված ենք խաղաղության պայմանագրի ստորագրման հարցում։ Առևտրի առումով տարածաշրջանի բացման հետ կապված մենք խնդիրներ չենք տեսնում։ Մարդկանց և ապրանքների տեղաշարժն Ադրբեջանից Նախիջևան ու Թուրքիա կարող է անարգել իրականացվել, իհարկե՝ հաշվի առնելով Հայաստանի օրենսդրությունն ու ինքնիշխանությունը»,- ասել է նա։
Միաժամանակ Սիմոնյանը անդրադառնալով տարածաշրջանում խաղաղության հաստատման խնդրին նշել է.
«Մենք բազմիցս Ադրբեջանին առաջարկել ենք, որ սահմանին գտնվող զորքերը հավասար հիմունքներով հետ քաշվեն։ Այս տարածաշրջանում խաղաղության հաստատումն անհնար է առանց Թուրքիայի։ Այս կապակցությամբ մենք հույս ունենք, որ Թուրքիան քայլեր կձեռնարկի այս տարածաշրջանում խաղաղություն հաստատելու համար»։
Թողնել պատասխան