ՌԴ նախագահ Վլադիմիր Պուտինը և Ֆրանսիայի նախագահ Էմանուել Մակրոնը հեռախոսազրույց են ունեցել, որի ընթացքում անդրադարձ են կատարել նաև Լեռնային Ղարաբաղի հիմնախնդրի կարգավորմանը։ Այդ մասին հայտնում է Կրեմլի մամուլի ծառայությունը։
«Լեռնային Ղարաբաղի հակամարտության կարգավորման շուրջ կարծիքների փոխանակման ժամանակ նախագահները գոհունակություն են հայտնել իրադրության կայունացման և խաղաղ կյանքի հաստատման, տարածաշրջանում տնտեսական և տրանսպորտային կապերի վերականգնման ուղղությամբ ձեռնարկվող ջանքերի կապակցությամբ: Նշվում է, որ այդ հարցերում Ռուսաստանն ու Ֆրանսիան ինչպես այժմ, այնպես էլ հետագայում մտադիր են գործել համաձայնեցված»,- նշվում է հաղորդագրության մեջ:
Հավելենք, որ Պուտինը շնորհավորել է Էմանուել Մակրոնին ծննդյան օրվա առթիվ։ Առաջնորդները Սուրբ Ծննդյան և Ամանորի տոներին ընդառաջ փոխանակվել են բարեմաղթանքներով։
Տեղեկացնենք, որ Ռուսաստանի Դաշնության Պաշտպանության նախարարության կոլեգիայի ընդլայնված նիստում ՌԴ նախագահը նշել է, որ ռուս խաղաղապահներն ավելի քան մեկ տարի է` Ղարաբաղում օգնում են կայունության պահպանմանը։
«Մեծ մասամբ նրանց ջանքերի շնորհիվ բարելավվել է հումանիտար իրավիճակը, ականազերծվել են մի շարք շրջանների տարածքներ, վերականգնվել են սոցիալական ենթակառուցվածքները, պահպանվել են պատմական և մշակութային հուշարձանները»,- ասել է Պուտինը։
Թողնել պատասխան