ՀՀ առաջին նախագահ Լևոն Տեր-Պետրոսյանի կարծիքով ընթացիկ ներքաղաքական առճակատումն ավելի է թուլացնում ԼՂ հարցում առաջիկա դժվարագույն բանակցություններում Հայաստանի դիրքերը: Տեր-Պետրոսյանի հոդվածը հրապարակվել է ilur.am-ում։
Տեր-Պետրոսյանը գրում է` անհասկանալի է, թե որն է այսօրվա ընդդիմության բուն նպատակը:
«Սերժ Սարգսյանի թեթև ձեռքով Նիկոլ Փաշինյանին փակցվել է «կապիտուլյանտ» պիտակը, ինչը թեև դիպուկ է, բայց կես-ճշմարտություն: Իրականում կապիտուլյացիայի է ենթարկվել ոչ թե Փաշինյանը, այլ Հայաստանը. Փաշինյանն ընդամենը ստորագրել է Հայաստանի կապիտուլյացիայի ակտը: Հետևաբար, ով էլ լինի Փաշինյանի փոխարեն՝ Ռոբերտ Քոչարյանը, Սերժ Սարգսյանը կամ թեկուզ Իշխան Սաղաթելյանը, միևնույն է՝ նրանք հլու-հնազանդ ընդունելու են այն լուծումը, ինչը փաթաթվելու է Հայաստանի վզին։ Խնդիրն, ըստ այդմ, Հայաստանի ղեկավարի անձից կախված չէ»,- նման կարծիք է հայտնել ՀՀ առաջին նախագահը` անհասկանալի համարելով այսօրվա ընդդիմության բուն նպատակը։
Նրա խոսքով` եթե այս պարզ ճշմարտությունը չհասկացվի, և մեր երկրի ներքաղաքական ցնցումները շարունակվեն, ապա մեզ պարտադրվող լուծումները շատ ավելի ցավոտ են լինելու։
Տեր-Պետրոսյանը նշում է, որ եթե ներկայիս ընդդիմության առաջնորդները չեն գիտակցում այդ փաստը, ապա դա նշանակում է, որ քաղաքականությունից ոչինչ չեն հասկանում: Իսկ եթե գիտակցում են, բայց շարունակում ներքաղաքական ցնցումները, ապա դրանից բխում է, որ նրանք բոլորովին այլ նպատակներ են հետապնդում, որոնք բացարձակապես կապ չունեն ազգային շահերի հետ:
Բացի այդ, ըստ նրա, ազգային շահերի հետ ոչ մի կապ չունեն նաև ներկայիս իշխանությունների կոշտ գործողություններն ընդդիմության կազմակերպած ցույցերի, երթերի և հանրահավաքների նկատմամբ:
Նա իր խոսքն ամփոփում է` ասելով, որ եթե մեր մտավորականներն իրապես ցանկանում են ազգանպաստ գործ կատարել, թող Նիկոլ Փաշինյանին, Ռոբերտ Քոչարյանին և Սերժ Սարգսյանին ստիպեն նստել մեկ սեղանի շուրջ և ելք գտնել ներքաղաքական ճգնաժամից: Նման առաջարկով Լևոն Տեր-Պետրոսյանը հանդես էր եկել նաև սույն թվականի հունվարի 15-ին։
Թողնել պատասխան