Բաքուն պնդում է, որ Արցախը խախտել է հրադադարի ռեժիմը

Ադրբեջանի պաշտպանության նախարարությունը պնդում է, թե Արցախի Պաշտպանության բանակը խախտել է հրադադարը:

Հաղորդագրության համաձայն, այս գիշեր՝ ժամը 2:30, «հրաձգային զենքից գնդակոծության են ենթարկվել ադրբեջանական բանակի դիրքերը Ֆիզուլիի շրջանի Յուխարի Վեյսելի, Խոջալուի շրջանի Սղնախ բնակավայրերում և Շուշիի մերձակայքում»: «Այդ ուղղություններով կրակը վարվել է ապօրինի հայկական ջոկատների կողմից, որոնք գտնվում են Ադրբեջանի տարածքում, որտեղ ժամանակավորապես տեղակայված են ռուսաստանյան խաղաղապահները»,- հայտարարում է Ադրբեջանի ռազմական գերատեսչությունը:

Հիշեցնենք, Արցախում հրադադարի ռեժիմի դիտարկում են իրականացնում ռուս խաղաղապահները՝ թուրք զինվորականների հետ համատեղ:

Ռուսաստանի պաշտպանության նախարարությունը երեկ հաստատել է ոչ թե հայկական, այլ ադրբեջանական կողմից հրադադարի խախտման փաստը՝ պաշտոնապես արձանագրելով, որ օգոստոսի 11-ին՝ ժամը 7։29-ին և 7։58-ին, Ադրբեջանի զինված ուժերը հարվածային տեսակի ԱԹՍ-ների կիրառմամբ երկու հարված են հասցրել «Լեռնային Ղարաբաղի զինված կազմավորումների դիրքերի ուղղությամբ» և որ ռուսական խաղաղապահ զորախմբի հրամանատարությունը միջոցներ է ձեռնարկել իրավիճակի հետագա էսկալացիան թույլ չտալու համար:

Ադրբեջանի զինուժը օգոստոսի 11-ին հարվածային անօդաչու թռչող սարքերով երկու հարված է հասցրել «Լեռնային Ղարաբաղի զինված կազմավորումների դիրքին»:

Ադրբեջանի պաշտպանության նախարարությունը հաղորդում է նաև երեկ երեկոյան «Գորիսի շրջանի Խազինավար» [ըստ երևույթին՝ Սյունիքի մարզի Խոզնավար] բնակավայրի դիրքերից Հայաստանի Զինված ուժերի ստորաբաժանումների կողմից «Լաչինի շրջանի Ղառըղշլաղ բնակավայրի ուղղությամբ ադրբեջանական բանակի դիրքերը գնդակոծելու» մասին:

Արցախի ՊԲ-ն հերքել է տեղեկությունը, իսկ Հայաստանի ռազմական գերատեսչությունը սահմանին ու շփման գծում իրավիճակի վերաբերյալ հաղորդագրություն այսօր դեռևս չի տարածել:

Դիտումների քանակը: 4164
Հետրեք մեզ telegram-ի միջոցով: @arcakh24
Մեկնաբանել կայքում
մեկնաբանւթյուն

Թողնել պատասխան

Ձեր էլ-փոստի հասցեն չի հրապարակվելու։

Հեղինակի մասին