Մենք պատրաստ պիտի լինենք Հայաստանին տրամադրել անհրաժեշտ միջոցներ իր ինքնիշխան տարածքը պահպանելու համար։ Այդ մասին այսօր հայտարարել է Ֆրանսիայի Վանդեի սենատոր, հանրապետականների խմբակցության նախագահ Բրունո Ռետայոն Սյունիքի Տեղ գյուղում։
Այսօր նրա գլխավորած պատվիրակությունը Տեղ գյուղում էր՝ իրավիճակին ծանոթանալու նպատակով։ Ֆրանսիացի պաշտոնյաները անընդունելի են համարել Ադրբեջանի ոտնձգությունները Հայաստանի սուվերեն տարածքի նկատմամբ։
«Վերադառնալով Ֆրանսիա՝ մենք առաջնահերթ մեր ազդեցությունը պիտի գործենք և՛ Ֆրանսիայի նախագահի մակարդակով, և՛ Ֆրանսիայի կառավարության մակարդակով։ Այս անգամ մենք դիմելու ենք պատժամիջոցների կիրառման պահանջով, որովհետև մենք չենք հասկանում, թե ինչու կարելի է զանազանել Ռուսաստանի և Ուկրաինայի իրավիճակը, որտեղ պատժամիջոցներ են կիրառվում Ռուսաստանի դեմ, որը ոտնձգություններ է կատարել Ուկրաինայի ինքնիշխան տարածքի նկատմամբ, նույն պատժամիջոցները այսօր չեն կիրառվում Ադրբեջանի նկատմամբ», — ասել է նա։
Ֆրանսիացի պաշտոնյան կարևորեց Արցախը Հայաստանին կապող միակ՝ Լաչինի միջանցքը [Բերձորի միջանցք] բացելու անհրաժեշտությունը։ Նրա խոսքով՝ միջազգային հանրությունը պետք է պատշաճ ձևով արձագանքի Արցախում և Հայաստանի սուվերեն տարածքում տեղի ունեցող իրադարձություններին։
«Պետք է Հայաստանում տեղակայվեն խաղաղապահ միջանցիկ զորքեր, որովհետև Ադրբեջանը հասկանում է միայն ուժի լեզուն, որովհետև Ադրբեջանը պետք է հասկանա, որ այստեղ իր դեմ լինելու է ուժային դիմադրություն, միայն այդ պարագայում հնարավոր կլինի երկարաժամկետ խաղաղություն հաստատել Հայաստանում և Արցախում»,- շեշտել է պաշտոնյան։
Ավելի վաղ Բրունո Ռետայոն իր թվիթերյան միկրոբլոգում գրել էր, որ «Հայաստանի Լաչինի միջանցքի հատվածում ադրբեջանական զորքերն իրենց վերահսկողության տակ են վերցրել Հակարի կամուրջը, որը ենթադրաբար հսկվում է ռուսական զորքերի կողմից: Ես կոչ եմ անում Ֆրանսիային վճռական արձագանքել»։
Թողնել պատասխան